Lög Íþróttabandalags Vestmannaeyja

Samþykkt á ársþingi 14. maí 2024

 

1. kafli

Tilgangur og markmið

1. gr.

Íþróttabandalag Vestmannaeyja (skammstafað ÍBV) er héraðssamband íþróttafélaga í Vestmannaeyjum. Það var stofnað 6. maí 1945.

 

2. gr.

Tilgangur ÍBV er:

 

a) Að efla, samræma og styðja við íþróttastarfsemi í Vestmannaeyjum í samræmi við íþróttalögin og reglur ÍSÍ.

b) Að hafa forystu í sameiginlegum félagsmálum og efla samvinnu íþróttaiðkenda í Vestmannaeyjum, svo og vera sameiginlegur fulltrúi félaganna utan héraðs.

c) Að vinna að framkvæmdum sem miða að því að efla íþróttaiðkanir innan héraðsins m.a. með umsögnum um íþróttamál og aðkomu að ákvörðunum um opinber fjárframlög til íþrótta, byggingu eða endurbótum íþróttamannvirkja í Vestmannaeyjum og skipulagningu íþróttasvæða.

d) Að varðveita og skipta á milli aðildarfélaganna þeim fjármunum sem ÍBV hefur yfir að ráða eða er falið að ráðstafa.

e) Að styðja við starfsemi aðildarfélaga og þau starfi samkvæmt gildandi lögum þeirra og íþróttahreyfingarinnar í heild samanber lögum ÍSÍ.

f) Að staðfesta lög aðildarfélaga, halda utan um staðfest lög þeirra og skila yfirliti til ÍSÍ yfir þau í lok hvers árs.

g) Að annast skýrslugerðir um íþróttamál í héraðinu.

 h) Að stuðla að fræðslu og bættri lýðheilsu meðal íþróttaiðkenda og íbúa í héraði.

i) Að hafa yfirumsjón með héraðsmótum innan héraðsins.

 

 

 

II. kafli

Réttindi og skyldur bandalagsfélaganna

3. gr.

Öll félög í Vestmannaeyjum sem hafa íþróttir á stefnuskrá sinni, hafa rétt til að gerast aðilar að Íþróttabandalagi Vestmannaeyja, enda fullnægi þau þeim skilyrðum sem á hverjum tíma gilda um frjálsa íþróttastarfsemi samkvæmt lögum og skilgreiningu ÍSÍ.

 

4. gr.

Óski félag að ganga í ÍBV, sendir það stjórn ÍBV umsókn sína, ásamt lögum félagsins, skýrslur um stofndag þess og ár, stjórn þess og tölu félagsmanna.

 

 

 

5. gr.

Aðildarfélög ÍBV skulu senda ársskýrslu og samþykkta ársreikninga til stjórnar ÍBV fyrir lok mars ár hvert.

 

 

6. gr.

Félag, sem ekki hefur sent ársskýrslu sína fyrir ársþing missir atkvæðisrétt sinn á næsta ársþingi ÍBV. Líði ár án þess að félagið geri skil á skýrslum skal ársþing taka ákvörðun um hvort félaginu skuli vikið úr ÍBV.

 

7. gr.

Víkja má félagi úr ÍBV um stundarsakir ef það brýtur gildandi lög um íþróttamál, sem og lög, reglur og ákvæði innan ÍBV og ÍSÍ.

  

8.gr.

Félag sem misst hefur réttindi vegna lögbrota eða vanskila getur ekki öðlast þau aftur fyrr en það hefur fullnægt settum refsiákvæðum eða ef um vanskil er að ræða, gert full skil.

 

9. gr.

Sérhvert félag innan ÍBV á rétt á að senda fulltrúa á ársþing bandalagsins. Skal tala fulltrúa félaganna miðuð við tölu félagsmanna þannig, að félög með 50 félagsmenn eða færri hljóti 1 fulltrúa, en síðan komi 1 fulltrúi fyrir hverja 50 félagsmenn þar fram yfir. Stjórnir félaga skulu útfylla kjörbréf fyrir fulltrúa sína á eyðublað, sem ÍBV leggur til og sjá um að það hafi borist stjórn bandalagsins fyrir þingsetningu.

 

 

III. kafli

Ársþing ÍBV

10. gr.

Ársþing ÍBV er fulltrúaþing. Það skal haldið árlega á tímabilinu 15. apríl til 15. maí. Boða skal þingið, með sannanlegum hætti með minnst mánaðar fyrirvara. Eigi síðar en 10 dögum fyrir ársþing skal senda aðilum dagskrá þingsins, upplýsingar um það hve marga fulltrúa aðildarfélögin eiga rétt á, reikninga, tillögur sem borist hafa, ásamt þeim tillögum sem stjórn bandalagsins hyggst leggja fyrir þingið. Framlagning gagna fyrir og á ársþingi má vera á rafrænu formi, verði því við komið. Tillögur sem óskast teknar fyrir á ársþingi, skulu hafa borist stjórn bandalagsins tveimur vikum fyrir þingsetningu.

 

11. gr.

Rétt til setu á ársþingi ÍBV eiga allir fulltrúar aðildarfélaga bandalagsins samkvæmt 10. gr. Einnig hafa eftirtaldir aðilar rétt til þingsetu með málfrelsi og tillögurétti;

• Stjórn og varastjórn ÍBV
• Fulltrúi framkvæmdarstjórnar ÍSÍ
• Fulltrúi ráðuneytis um íþróttamál
• Fulltrúi bæjaryfirvalda Vestmannaeyjabæjar

 

 

 

12. gr.

Verkefni ársþingsins eru:

1. Þingsetning

2. Kosning þriggja manna kjörbréfanefndar

3. Kosning þingforseta og ritara

4. Skýrsla stjórnar og umræður

5. Reikningar ÍBV, umræður og atkvæðagreiðsla

6. Skýrslur félaga, umræður og atkvæðagreiðsla

7. Ræddar lagabreytingar, ef fyrir liggja

8. Ræddar tillögur er fyrir liggja

 

Þinghlé

 

9. Álit nefnda, umræður og atkvæðagreiðsla

10. Kosningar

a) Kosinn formaður ÍBV

b) Kosin stjórn ÍBV, 4 aðilar.

d) Kosið í laganefnd, tveir fulltrúar og einn til vara.

e) Kosið í aðrar nefndir ef tillögur hafa borist.

11. Önnur mál

12. Þingslit

 

Öllum stærri málum, sem þingið fær til meðferðar, skal vísa til nefnda og starfa þær á þinginu. Allar kosningar skulu vera bundnar og skriflegar nema ef ekki eru fleiri tilnefndir heldur en kjósa á. Þá eru þeir sjálfkjörnir án atkvæðagreiðslu. Verði atkvæði jöfn ræður hlutkesti. Á þinginu er heimilt að flytja erindi eftir því sem aðstæður leyfa og stjórn ÍBV telur við hæfi.

 

13. gr.

Aukaþing skal halda, ef meirihluti stjórnar ÍBV telur þörf á eða ef tilmæli koma um það samkvæmt fundarsamþykkt frá meirihluta fulltrúa aðildarfélaga bandalagsins. Einnig skal halda aukaþing ef ÍSÍ sem ÍBV er aðili að mælist til þess. Boða skal til aukaþings með sannarlegum hætti með tveggja vikna fyrirvara. Aðildarfélög bandalagsins hafa sömu fulltrúa og á næsta ársþingi á undan, sbr. 10. gr. síðustu málsgreinar.

Þetta er starf aukaþings:

1. Þingsetning

2. Kosnir þingforseti og þingritari sbr. 13.gr.3

3. Tekin til meðferðar mál þau sem gefið hafa tilefni til aukaþings og tilkynnt voru með þingboðinu.

4. Önnur mál, sem upp kynna að vera borin, ef þingið leyfir að taka þau fyrir sbr. 15. gr.

5. Þingslit

Á aukaþingi ÍBV má ekki gera breytingar á lögum eða reglum ÍBV né kjósa í stjórn þess nema bráðabirgðastjórn, ef meirihluti aðalstjórnar hefur sagt af sér eða hætt störfum, eða stjórnin að eigin dómi orðið óstarfhæf. Kjósa má fulltrúa að nýju í stað fulltrúa sem er látinn, veikur eða fluttur úr héraði.

 

 

 

14. gr.

Í málum þeim, sem tilkynnt hafa verið í þingboði til ársþings eða aukaþings, ræður einfaldur meirihluti úrslitum. Þó þarf 2/3 hluta atkvæða fundarmanna til að samþykkja lagabreytingar. Um þau mál sem ekki koma fram fyrr en á viðkomandi þingi þarf 2/3 hluta atkvæða til þess að þau verði tekin á dagskrá og 4/5 hluta til þess að þau hljóti fulla afgreiðslu.

 

15. gr.

Atkvæðisrétt á þingum ÍBV hafa aðeins fulltrúar frá bandalagsfélögum ÍBV skv. 10. gr. og fer enginn með meira en eitt atkvæði.

Bandalagsfélag getur misst réttindi að meira eða minna leyti vegna dómsúrskurðar frá dómstóli ÍSÍ og tala þeirra fulltrúa sem það á rétt á þannig breyst milli þinga.

 

IV. kafli

Stjórn ÍBV og starfssvið

16. gr.

ÍBV stjórna þeir fulltrúar sem til þess hafa verið kjörnir í stjórn bandalagsins á ársþingi ÍBV til eins árs í senn. Formaður skal kjörinn sérstaklega sbr. 12. gr. 10a. Aðrir skulu kjörnir sbr. 12.gr. 10b, fjórir aðalmenn. Stjórnin skiptir með sér verkum.

 

17. gr.

Stjórn ÍBV skal sjá um allar framkvæmdir bandalagsins og vinna að málum þess. Stjórninni skal heimilt að skipa nefndir innan eða utan sinna vébanda, til þess að sjá um og framkvæma viss mál bandalagsins. Formaður skal kalla saman stjórnarfundi eftir þörfum. Að öðru leyti setur stjórnin sér sjálf starfsreglur. Stjórnarfundir eru lögmætir, ef meirihluti stjórnarinnar mætir og fundur hefur verið boðaður samkvæmt starfsreglum. Atkvæði formanns ræður úrslitum ef atkvæði verða jöfn.

 

17 a) Valnefnd skal skipuð einum fulltrúa frá hverju aðildarfélagi ÍBV og formanni Íþróttabandalags Vestmannaeyja, sem skal vera formaður nefndarinnar og kalla valnefnd saman til fundar. Hlutverk valnefndar er að kjósa um íþróttamann Vestmannaeyja, íþróttamann æskunnar eldri og yngri eftir tilnefningu aðildarfélaganna.

 

 

 

18. gr.

Í þeim íþróttagreinum, þar sem stjórnir eru ekki starfandi ferð stjórn ÍBV með hin sérfræðilegu málefni innan héraðs og getur skipað til þess sérstaka nefnd, ef hún telur það hagkvæmara. Stjórn ÍBV fer með stjórn í sérmálum þeirra íþróttagreina, sem það varðar. Sjá þó 2. gr.r. Reglur varðandi verðlaunagripi til keppni innan héraðs skulu háðar samþykkir stjórnar ÍBV.

 

19. gr.

Að loknu ársþingi gefur formaður ÍBV út skírteini handa stjórninni er gilda næsta starfstímabil og veita henni ókeypis aðgang að öllum íþróttamótum á bandalagssvæðinu.

 

 

 

20. gr.

Dómstólar ÍSÍ hafa lögsögu í málefnum ÍBV í samræmi við ákvæði laga ÍSÍ.

 

21.gr.

Ákvörðun um slit bandalagsins skal taka á ársþingi og þarf slík tillaga að vera auglýst samhliða fundarboði. Það þarf 2/3 hluta atkvæða til að samþykkja slit bandalagsins og skulu eignir bandalagsins renna til íþróttastarfsemi í Vestmannaeyjum sem nánar skal ákveðið á slitafundi.

22. gr.

Um þau atriði, sem ekki eru tekin fram í lögum þessum gilda eftir því sem við á ákvæði laga ÍSÍ.

23. gr.

Lög þessi öðlast gildi þegar framkvæmdarstjórn ÍSÍ hefur staðfest þau.